【低級兼職煮婦的30分鐘瘋狂懶人食譜】✨大肚雞翼 與 豆豉鯪魚意粉 ✨

大肚雞翼

今次釀左蝦膠。因為臨時決定要做，今次用左現成蝦膠，當然有時間係極力推介自己打，口感更一流～

自打蝦膠

材料 (可釀約8隻雞翼)

• 雪藏蝦2包 (我買開百佳有得賣既"南美白對蝦肉,每包180g)
• 調味料：鹽、胡椒粉

做法

1. 雪藏蝦解凍，切碎
2. 留起少量備用
3. 其餘切碎後放疊大碗中加適量鹽、胡椒粉調味
4. 大碗順時針攪拌至起膠 (我比較鐘意用手撻，會更快起到膠)
5. 加入2.的碎蝦仁，拌均備用 (加入碎蝦仁會更有口感)

 

無骨雞翼

拆骨法

1. 雞翼頭尾兩部分用較剪水平剪開關節位，再用手輕扭斷。
2. 較剪由較闊一面插入，由上到下剪斷中骨筋肉相連位。
3. 放於砧板上，將肉由上而下推 (呢個時候隻雞翼應該如下圖反轉左) ，條骨就會甩出黎。
4. 反番正隻翼備用

骨都拆埋，只需版將蝦膠釀入雞翼，料唔怕多，太爆既拎牙簽拮住定位 (以防煎既時候爆開)，再放落平底鑊中火煎8-10分鐘至金黃色就攪掂～如果想更加好食，我係面度搽左層蜜糖再放光波爐波左5分鐘等佢脆面就可以熄爐上碟！

豆豉鯪魚意粉

一聽好似係兩個加埋伏味好濃既食物，但撈埋其實出奇地夾。靈感在於上星期去高興Cafe既出品，除左簡單自己係屋企好容易做，自己做仲可以少油健康d～

豆豉鯪魚開罐後記得走油，意粉烚好後，再撈埋攪掂！最後上碟前我再輕輕灑多左轉鯪魚油等佢香Ｄ，落曬就免喇....個味都同出面食既有9成相似！

有圖有真相，上圖自家出品VS 下圖CAFE出品 ：）