食記 -〔九龍城搵食系列〕✨ 港嘢茶檔　　

行過幾次都比佢既舊香港情懷既裝修吸引左，但每次唔係時間唔岩呢，就係太多人排隊。第一次接觸港嘢茶檔其實係飲左佢杯外賣凍奶茶先，覺得個茶底唔錯，$20咁大杯係好有驚喜。
今次真係好想試食佢個下午茶時段先有既招牌蛋白西多，特登較正2:30pm後入座。

同出面茶餐廳一般既煎西多好唔同，首先佢係只用蛋白煎，夾住既麥香醬都係出面好少見。甜甜地既麥香醬食到既係啖啖碎麥皮，有嚼頭。食麥香醬感覺上健康過用花生醬好多，煎既西多都無出面既咁油膩。

大少叫既全日早餐，跟餐既有牛角包、滑蛋、吞拿魚沙律，呢三樣野都唔錯，牛角包係旁邊同集團酥妃皇后既出品，有質素保證。跟餐仲可以自選一款麵食，佢選左厚豬潤米，由於我唔食豬潤所以no comment..佢就話幾好味，唔會太鞋口。

新鮮本地牛肉，同街市李輝記拎貨，烚完既肉唔鞋口，配埋個出前一丁爽麵，得啦！熱奶茶都好正，茶底香濃，奶唔會太多。

另外見到對面個人食碟煎肉餅飯幾正，號稱係手剁肉餅，即叫即做，下次必試！

溫馨提示：

店面唔算大，檯同檯之間距離好近，weekend 黎既9成9要搭檯，介意者慎。

港嘢茶檔
地址：九龍城侯王道22號地鋪

余師奶生活記。